Om føredragshaldarane og føredraga:

Jens Skarkerud Haugan er dosent i norsk (nordisk språk) ved Universitetet i Innlandet og leiar i Hamar dialekt- og mållag. Jens gjennomførte ein intervensjonsstudie på eit tiande-trinn, der elevane fekk ei førelesing om språkhistorie og utviklinga av dei to norske skriftspråka, og elevane i etterkant skulle skrive eit refleksjonsnotat, der dei blant anna skulle svare på om dei hadde endra synet sitt på nynorsk. Resultatet er kanskje ikkje så overraskande og kjent frå andre undersøkingar, men svært tydeleg og kan tene som eit grunnlag for bevisstgjering og haldningsarbeid i skolen.

Eline Bjørke er universitetslektor i nordisk språk ved Universitetet i Innlandet, leiar i Noregs lærarmållag og medlem i Hamar dialekt- og mållag. Saman med Elise Takle, som er lærar ved Tårnåsen skole, har ho gjort eit sonderande oversyn som undersøker kva rolle lesing på nynorsk kan og bør ha i sidemålsopplæringa der nynorsk er sidemål. Gjennom ei under-søking av 28 tekstar som tematiserer lesing på nynorsk som sidemål, har vi syntetisert fag- og forskingslitteraturen til fem ulike kategoriar av funn som skildrar føremål, funksjonar og rammefaktorar for nynorsklesing. Det ser ut til at fag- og forskingslitteraturen har eit instrumentelt syn på nynorsklesing, der lesing på nynorsk blir sett på som ei form for innputt og ein føresetnad for å kunne skrive. I tillegg legg fag- og forskingslitteraturen vekt på at nynorsklesing kan ha ein viktig funksjon i å senke det affektive filteret til elevane og bidra til motivasjon og positive haldningar. Båe desse funna kan mellom anna knytast til den didaktiske tilnærminga der nynorsk får rolle som bruksspråk i opplæringa. Eit sentralt poeng i studien er at det verkar å vere ein avstand mellom faktisk praksis og praksisen fag- og forskingslitteraturen trekker fram som god.

Espen Tørseter lektor ved Orkland vidaregåande skole og sit i styret til Noregs Mållag. Han vil presentere praktiske tips til læraren om korleis elevane sjølv kan finne inspirasjon til kvifor dei skal lære nynorsk. 

Ole Gillebo er lektor i norsk og historie ved Lillehammer vgs. og har master i nordisk språk frå NTNU. Dei siste åtte åra har han undervist i norsk, ved både Lillehammer vgs. og Hammerfest vgs. Føredraget til Ole vil byggje på døme og erfaringar frå klasserommet om arbeid med nynorsk som sidemål. Ambisjonen er å klargjere spørsmålet i tittelen og dele tilnærmingar til korleis ein kan jobbe med nynorsk i ein travel norsklærarkvardag.

Maren Eika har ein master i nordisk språk frå NTNU, tok PPU på Hamar og har mange års erfaring med norskundervisning. Til dagleg arbeider ho som lektor på ein ungdomsskule i Asker, ein utprega bokmålskommune, som mange andre kommunar på Austlandet. Tidlegare har ho undervist på vidaregåande skular i Bærum. Ho er oppteken av å skape god og motiverande sidemålsundervisning for ei gruppe elevar der motivasjonen ikkje alltid kjem av seg sjølv.

Ingar Arnøy er skulemålsskrivar i Noregs Mållag og har lang erfaring frå alle felt innan målarbeid.

Ingvild Myklebust Hovden er kommunikasjonsrådgjevar på Nynorsksenteret ved Høgskulen i Volda. Ho har ansvar for å synleggjere nettsidene nynorsksenteret.no og nynorskbok.no for lærarar over heile landet.

Ida Lovise Bøe er høgskulelektor ved Nynorsksenteret i Volda og underviser i norsk ved Steinkjer videregående skole. Ho er òg nettverksleiar i norsk i Trøndelag fylkeskommune. I undervisninga legg ho vekt på å skape engasjement og finne gode inngangar til norskfaget. I føredraget Litteratur som inspirerer og engasjerer snakkar ho om nynorsk litteratur som grip og motiverer elevar. Med utgangspunkt i eit konkret undervisningsopplegg frå to påbyggsklassar denne våren viser ho korleis tekstar kan opne opp for refleksjon, engasjement og nye perspektiv. Elevane har utforska temaet annleis, forankra i både den overordna delen av læreplanen og læreplanen i norsk. Gjennom undervisningsopplegget ho legg fram, viser Bøe korleis litteraturen kan hjelpe oss å forstå andre menneske – og kvifor det er så viktig.

Nettstad: http://www.jenshaugan.com/nynorskseminaret/