Andor Normann svarte meg svært så elegant i Hamar
Dagblad 24.3. Eg er glad for at det litle ordspelet
mitt (”språkstuten” vs. ”kattastuten”) blei teke med
eit smil, sidan eg ikkje på nokon som helst måte har
som intensjon å fornærme nokon. Så eg takkar for ein
velvillig debatt så langt. Kanskje det er den same
dialektale bakgrunnen vår som gjer at vi kan tillate
oss å bruke slike uttrykk.
Men det mest ”elegante” med Normann sitt svar var
kanskje korleis han klarte å ta det eg skreiv, til
inntekt for sitt eige politiske syn. Sjølv om eg var
klar over då eg skreiv den (mis-)brukte setninga:
”Men dersom noko parti skulle føreslå å foreine
bokmål og nynorsk til eitt felles skriftspråk,
norsk, med stor mogleg variasjon i begge retningane,
skal eg vere den første til å stemme på eit slikt
forslag.” at dette ville kunne mistolkast eller
misbrukast, håpa eg på at ein ville setje dette i
rett perspektiv, noko som Andor Normann ikkje
gjorde. Men det var ein elegant vri, som sagt.
Eg støttar på ingen måte eit parti eller ein
politikk som er så kultur- og individfiendtleg at
det vil fjerne skriftvariantar som nettopp tek
utgangspunkt i det som Normann og andre kallar for
”ekte vare” som har vakse fram ”i ulike regioner
gjennom århundrene”. Det er ei stor gåte for meg
korleis Normann, Ørbæk og andre kan halde fast på og
i det uendelege gjenta påstandane om at det er
bokmålet som er det einaste ekte norske språket,
mens nynorsk skal vere eit kunstig språk og til og
med eit ”abrakadabra” ifølgje Normann. Eg lurer på
om dei same dansk-norsk-protagonistane hadde vore
like bastante i sine påstandar dersom det hadde vore
tysk som hadde blitt administrasjonsspråket i Noreg,
og ein i ettertid hadde prøvd litt etter litt å
tilpasse tysk til norsk ved å endre på rettskrivinga
og tillate visse ord over ein hundreårsperiode. Det
hadde nok ikkje vore mykje motstand mot å bruke det
munnlege språket ein faktisk prata i Noreg, og lage
eit skriftspråk ut av det. Det er interessant
korleis ein vel å sjå bort ifrå språkhistoriske
fakta når ein vel standpunkt i språkdebatten i dag.
Når Normann og Ørbæk og andre roser visse parti for
å ha teke eit standpunkt, nemleg å setje
språksituasjonen på dagsorden, referer dei til
populistiske standpunkt som å fjerne nynorsk, anten
som sidemål i skolen, eller eventuelt heilt som
offisielt skriftspråk. Normann ber Arbeidarpartiet
om å ta opp språksaka på neste landsmøte. Eg kan då
orientere Normann og andre om at det faktisk
føreligg eit utmerka strategidokument for
språksituasjonen som den raud-grøne regjeringa har
arbeidd ut ifrå i mange år.
”Norsk i hundre” er eit dokument på heile 192 sider
utarbeidd av Språkrådet i 2005. Som eit resultat av
dette fekk ein Stortingsmelding 35, 2007-2008, ”Mål
og meining. Ein heilskapleg norsk språkpolitikk” på
266 sider. Sjølvsagt vil dette vere altfor mykje
tekst å lese og fordøye for nokon som går for
lettvinte løysingar og parolar som ”sel”, slik som
”billigare bensin”, ”restriktiv innvandring” eller
”valfritt sidemål”. Vi har faktisk ein politikk som
set seg over slike debattar om anten bokmål eller
nynorsk. ”Ja, takk, begge delar” er faktisk ein
mykje betre veg å gå i denne samanhengen.
Både bokmål og nynorsk er ”norsk”. Det er dei to
offisielle skriftspråka vi har i Noreg, og begge er
dermed likeverdige og like norske, og saman
representerer dei mangfaldet i norsk språk og
kultur. Om eg eller Andor Normann pratar nordlending
her på Hedmarka, er vel heller ikkje lenger grunn
nok til å nekte oss hybel eller jobb. Staten har
ifølgje ”Norsk i hundre” som overordna mål ”å sikra
norsk (nynorsk og bokmål) som det samfunnsberande
nasjonalspråket i Noreg”. Det skal altså i
utgangspunktet vere hipp som happ kva målform den
enkelte av oss bruker.
Men Norsk i hundre slår òg fast: ”Det må også vera
eit overordna mål å sikra både bokmål og nynorsk som
fullverdige bruksspråk i samfunnet. Det inneber å
leggja forholda spesielt til rette for nynorsk som
mindretalsspråk. Spissformulert kan ein seia at så
lenge nynorsk og bokmål ikkje er fullt likestilte,
kan ikkje norsk, forstått som to likestilte
målformer, seiast å vera fullt ut samfunnsberande.”
Eg meiner at utspela til Normann, Ørbæk og mange,
mange andre nynorskmotstandarar i praksis
motarbeider ein politikk der ein ønskjer å skape eit
inkluderande samfunn basert på norsk språk og
kultur. Dersom eg skulle gje eit råd til
politikarane, ville det vere å lese dei 192 sidene i
”Norsk i hundre” før ein snekrar i hop eit
partiprogram som ein meiner vil kunne trekkje
stemmar. Å drive rikspolitikk handlar trass alt om
meir enn lettvinte løysingar og billig bensin eller
litt mindre skolepensum i enkeltfag. Men innimellom
kan ein jo lure på om kanskje nynorsken òg skulle
bli privatisert etter kvart.
Kva med Adecco? Kanskje dei burde satse på å leige
ut kvalifiserte nynorsklærarar? Det kan jo hende at
det er dét som ville vere den beste løysinga for å
betre nynorskkompetansen og -toleransen. Ka du sei,
Andor Normann? Trur du AP vil høyr på me dersom e
sende dem ein kopi av detta innlegget? Vi treng vel
nån tusen dialektlærara òg med det same, vesst det
ska bli noka fart i dialekt som ”sidemål” i skolen?
Ka du trur?