Beklagar, Andor Normann, men eg måtte berre lage
denne overskrifta etter innlegget ditt ”Språkstriden
og Stutene på Katta” i Hamar Dagblad 10. mars. Eg er
glad i språk, og eg likar å leike meg med ord. Så då
får du berre lese i ordet det du vil.
Du skreiv eit relativt langt innlegg, som var
interessant på mange måtar. Men hovudpoenget ditt,
at du ville ha bokmål som einaste skriftspråk,
argumenterte du ikkje særleg godt for. Du er einig i
Per Johansen sin ”konklusjon” om å ha bokmål som
einaste hovudmål. Men som eg skreiv i HA 3. mars, så
er kanskje premissane for denne ”konklusjonen” ikkje
nødvendigvis så veldig gjennomtenkte. Premissane som
eg les ut av ditt innlegg, Andor Normann, er òg
først og fremst: du syntest nynorsk var vanskeleg og
unødvendig, og du meiner språkstriden har endra seg
sidan den gongen du gjekk på skole. Alt i alt er
dette for så vidt greitt nok for å ønskje anten det
eine eller det andre. Men å bruke manglande
interesse og eventuelt inkompetanse på eitt bestemt
felt som eit grunnlag for å ville diktere kva alle
andre i Noreg skal meine, er ikkje så greitt.
Det vil alltid vere fag og emne i skolen som den
eine eller den andre har problem med. Det i seg
sjølv bør ikkje vere grunn nok til å fjerne faget
eller emnet. Vi har mange lærarstudentar som opptil
fleire gonger stryk i matematikk, men faget vil
likevel ikkje bli fjerna frå lærarstudiet – uansett
kor mykje studentane eventuelt måtte ønskje det. Det
er godt å lese at det var framgang og ros i nesten
alle fag den gongen på Katta. Hadde du hatt den same
motivasjonen for nynorsk, hadde du kanskje også hatt
framgang der og fått ros av læraren. Men
motivasjonen og innsatsen måtte du i så fall finne
hos deg sjølv.
Det er greitt nok å bestemme seg for at det er noko
ein ikkje likar, og at ein ikkje vil engasjere seg i
det. Det er eit personleg val. Men derifrå å komme
fram til at noko er unødvendig, uviktig eller
bortkasta, er eit mykje lengre steg. Du ønskjer deg
bokmål åleine som hovudmål. Sidan du kallar det
hovudmål, inneber det vel at du framleis reknar med
eit sidemål? Eller vil du at alle nynorskbrukarar
berre skal slutte å bruke nynorsk fordi du personleg
ønskjer eit enklare liv? Vil du berre fjerne heile
den nynorske kulturen i Noreg, som strekkjer seg
over 150 år og er viktig for hundretusenvis av
menneske, fordi du sjølv hadde problem ein gong for
lenge sidan då du gjekk på ”stupekurset”? Er det
slik at den korte tida av livet ditt som du
personleg brukte på nynorsk, har vore så traumatisk
for deg at du meiner dette bør vere ei politisk sak
for heile landet? Er det sånn at nynorsk er eit
problem for deg i kvardagen i dag? Neppe.
Det er heilt sikkert at eit land som Noreg ikkje har
”behov” for to sidestilte skriftspråk. Men med den
innvikla språkhistoria vi faktisk har hatt, og med
motstanden som samnorskpolitikken fekk – spesielt
ifrå bokmålssida – har det dessverre (eller
heldigvis?) ikkje vore mogleg å komme fram til eitt
felles skriftspråk. Vi har to skriftspråk som er
sidestilte, og då kan ein ikkje utan vidare bestemme
at det eine skriftspråket skal fjernast med eit
pennestrøk. Språkleg sett er vi fleirkulturelle i
Noreg, om ein likar det eller ikkje. Vi har uansett
fått utvikla ein veldig rik og spennande kultur med
utgangspunkt i begge målformene. Men dersom noko
parti skulle føreslå å foreine bokmål og nynorsk til
eitt felles skriftspråk, norsk, med stor mogleg
variasjon i begge retningane, skal eg vere den
første til å stemme på eit slikt forslag. Så lenge
dette ikkje er politisk mogleg, vil eg argumentere
for at ein skal vise toleranse overfor begge/alle
leirane i staden for å gå til åtak mot éi av
målformene (nynorsk) og heile kulturen som er knytt
til den. Ja, til eit inkluderande språkfellesskap!