Etter å ha skrive om ”verktøy” i grammatikken, fekk
eg lyst til å vise korleis systematisk bruk av
grammatiske verktøy faktisk har endra
skolegrammatikken i Noreg.
Dei fleste vaksne har lært om ordklassane på skolen.
Inndelinga av orda i ulike ordklassar er relativt
gammal og har vore ein del av tradisjonell
grammatikkundervisning så lenge vi har hatt eit
organisert skolesystem i Noreg. Henrik Wergeland
skreiv t.d. i 1833 eit pedagogisk dikt i samlinga
”For Børnene”, som han kalla ”Sproglære”. Diktet
blei skrive for at elevane lettare skulle lære dei
ti ordklassane. Diktet sluttar med: ”Af ti
Taledele da Sproget bestaaer. Igjennem det
Tanken af Sjelen udgaaer.”
Den tradisjonelle ordklasseinndelinga opererte med
ti klassar: substantiv, pronomen, artiklar,
adjektiv, talord, verb, adverb, preposisjonar,
konjunksjonar og interjeksjonar. Dei fleste vil
kjenne igjen desse ordklassane ifrå norsktimane
eller eventuelt ifrå undervisninga i eit
fremmendspråk.
Ein skulle tru at slik kunnskap om grammatikk var
evigvarande. Men det er den faktisk ikkje. Den
tradisjonelle ordklasseinndelinga viste seg å vere
inkonsekvent på mange område. Språkforskarane
etterlyste ein meir konsekvent bruk av dei
grammatiske verktøya i klassifiseringa av orda. Ein
gjekk då systematisk til verks for å komme fram til
ein praktisk metode som gjorde det mogleg å bestemme
ordklassar ut ifrå konkrete kriterium som ein kunne
følgje.
I artikkelen om grammatiske verktøy nemnde eg fem
hovudområde i grammatikken: fonologi, morfologi,
syntaks, semantikk og pragmatikk. Det er kanskje
innlysande at uttalen av eit ord ikkje burde spele
noka vesentleg rolle når ein skal klassifisere eit
ord. Ein treng altså ikkje fonologi som grammatisk
verktøy i ordklasseinndelinga. Måten ein bruker eit
bestemt ord på (pragmatikk), er heller ikkje
nødvendigvis alltid noko godt kriterium. Dersom eg
seier ”Døra!” og meiner at nokon skal lukke døra
eller passe på at ho ikkje smell igjen, blir ikkje
”døra” til eit verb av den grunnen. Men morfologi,
syntaks og semantikk er viktige verktøy i
ordklasseinndelinga, og dei skal brukast i nettopp
den rekkjefølgja.
Ein startar med å sjå på om eit ord har bøying, som
er eit morfologisk kriterium. Det har å gjere med
forma til ordet. Ord med bøying, kan høyre til visse
ordklassar og ikkje andre og omvendt. Det finst også
ulike måtar å bøye ord på. Substantiv blir t.d.
bøygde i eintal, fleirtal og bestemtheit, mens verb
kan bli bøygde i tid.
Det neste kriteriet er syntaktisk. Dvs. at ein ser
på korleis eit ord oppfører seg i forhold til andre
ord i setninga. Substantiv vil t.d. kunne ha
funksjon som subjekt eller objekt i setninga. Som
subjekt vil substantiv vanlegvis stå direkte framfor
det finitte verbet eller direkte bak det finitte
verbet. I norsk står det finitte verbet alltid på
andre plass i setninga. Det er i seg sjølv eit
syntaktisk, altså plasseringsmessig, kriterium.
Dersom ein framleis er usikker på kva ordklasse ein
skal putte eit ord i, kan ein gå over til det
semantiske kriteriet. Då vil ein sjå på sjølve
tydinga til ordet. Hovudskiljet går her mellom ord
som har ei tyding utanfor setninga (innhaldsord), og
ord som spelar ei grammatisk rolle i setninga
(funksjonsord). Det er lett å peike ut kva ein
snakkar om, når ein seier ”dør”. Ordet ”dør” har eit
innhald knytt til konkrete representantar for tingen
det refererer til. Det er derimot vanskeleg å peike
på eller beskrive kva ”og”, ”men” eller ”at” skal
kunne vise til. Dette er typiske funksjonsord. Dei
fungerer som grammatiske element i ei setning.
Nokre språkforskarar blei altså einige om å
praktisere ordklasseinndelinga etter faste prinsipp.
For å vere konsekvent og rydde i den tradisjonelle
ordklasseinndelinga, blei nokre ordklassar fjerna,
mens nye ordklassar kom til.
I 1997 gav språkforskarane Jan Terje Faarlund, Svein
Lie og Kjell Ivar Vannebo ut ”Norsk
referansegrammatikk”, som er ei bok på over 1200
sider som presenterer ein grammatikk med konsekvent
bruk av dei grammatiske verktøya i forhold til bl.a.
ordklassane. I 2005 byrja ein så etter tilråding frå
Utdanningsdirektoratet og Språkrådet å endre
terminologien i undervisninga i skolen. Det er altså
berre fem år sidan den tradisjonelle
skolegrammatikken i Noreg blei revolusjonert på
grunnlag av systematisk bruk av grammatiske verktøy.
Dei nye ordklassane er: substantiv, pronomen,
adjektiv, determinativ, verb, adverb, preposisjonar,
konjunksjonar, subjunksjonar og interjeksjonar. Det
tyder at artiklar og talord har forsvunne som
ordklassar. Medlemmane i desse klassane er no
fordelte på adjektiv og determinativ, alt etter
korleis dei oppfører seg i forhold til dei nemnde
kriteria. Determinativ er ein ny ordklasse som
inneheld ulike typar bestemmarord. Den andre nye
ordklassen er subjunksjonar, som tidlegare var ei
undergruppe av konjunksjonar. Forskjellen mellom dei
er at konjunksjonar bind saman likeverdige frasar,
mens subjunksjonar innleiar underordna setningar.
Språkforsking er spennande på så mange måtar – og
anvendt språkforsking kan altså endre oppfatninga av
kva folk flest har lært og meint om grammatikk.