NRK og nynorsk
JENS
HAUGAN
Førsteamanuensis i norsk, Høgskolen i Hedmark / Hamar dialekt- og
mållag
__________________________________________________________
B. K. Ørbæk kastar gjerne rundt
seg med tal for å ”dokumentere” bruk av nynorsk. Men
eg har framleis til gode å sjå at han bruker tal frå
offisielle kjelder.
30. mars
skreiv Ørbæk at nynorsk var ”et lite minoritetsspråk på ca. 5 %”. No
er det riktig nok i ikkje så enkelt å måle slikt. Det er dessutan
også eit definisjonsspørsmål om nynorsk er eit språk eller ei
målform, som saman med bokmål representerer norsk. Men det finst
statistikkar over dei som bruker nynorsk som skriftspråk. Språkrådet
skriv at nynorsk blir brukt i skrift av 10 – 15 %. Ørbæk sine 5 % er
ca. 250.000 brukarar, mens 10 – 15 % er 500.000 til 750.000
brukarar. Det er kanskje ein minoritet, men det er svært mange,
levande menneske med same rett til å velje éi av dei to målformene.
Ørbæk
påstår elles at nynorsk (”dette kunstige særspråk”) for tida
dominerer i tekstinga av nyheiter og utanlandske filmar – ”i den
grad at vanlige mennesker lurer på om galskapen fullstendig har gått
amok”. No er det no éin ting at Ørbæk meiner at hundretusenvis av
nordmenn ikkje er vanlege menneske (elles kan jo ”vanleg” også ha ei
anna tyding, som eg ikkje skal komme inn på her). Men ein annan ting
er å påstå at det plutseleg skal ha skjedd ei endring i bruken av
nynorsk i TV-sendingar.
For det
første er det berre NRK som er underlagt lova om målbruk i offentleg
teneste. ”Vanlege” folk er dermed rimeleg skåna for å bli torturerte
med nynorsk ”i tide og utide”. Men heller ikkje trufaste brukarar av
NRK sine program vil kunne dokumentere at nynorsk blir brukt meir
enn før eller til og med ”dominererer”.
NRK sine
eigne tal viser nynorskprosenten i dei ulike TV- og radiokanalane.
Det er svært varierande tal, men gjennomsnittet for t.d. 2008 var 20
%. Informasjonsavdelinga til NRK innrømmer elles at dei har problem
med å oppfylle kravet om 25 % nynorsk. Språkrådet sin statusrapport
for 2011 fortel at nynorskbruken går tilbake i fem av sju
NRK-kanalar. Alt dette er sikkert berre vatn på mølla til Ørbæk sin
fleirtalspolitikk. Men dei faktiske tala er klare på at ein ikkje
kan påstå at NRK ”pøser på med nynorsk”. Den totale nynorskprosenten
for alle TV-kanalane er nok langt under 5 %. |