Eg
hadde eit innlegg i HA den 12.01. om forskjellen
mellom ”og” og ”å” og var bl.a. innom uttalen, som
for begge orda kan vere ”å”. Dette er éi av fleire
moglege årsaker til at mange har problem med å vite
når dei skal bruke ”og” eller ”å”. Ei anna side ved
dette fenomenet er at forskjellen kan bli oppfatta
som mindre og mindre relevant dess oftare ein ser
”feil” bruk av ordformene. ”Når læraren min skriv
feil, er det vel ikkje så nøye om eg sjølv også
skriv feil”; eller ”når det står i avisa eller på
nettet, må det jo vere riktig”.
Vanleg med korrektur
Tradisjonelt ser vi på skriftlege tekstar som noko
som er ”kvalitetssikra”, i alle fall når dei står på
trykk i ein eller annan offentleg samanheng. Før i
tida var det vanleg at ein hadde nokon som
korrekturlas alt før det kom på trykk. I dag er
dette dessverre mindre vanleg. Og spesielt på
Internett vil ein kunne lese litt av kvart. Eitt
aspekt ved det førre innlegget mitt om ”og” og ”å”
var at nokre skrivefeil slepp igjennom fleire ledd i
eit redaktørsystem til og med når dei førekjem i ei
overskrift. Men ei anna side ved dette er nettopp
det at nokre slike skrivefeil er så pass vanlege
blant ”folk flest” at ein ikkje reagerer på dei,
sjølv om ein til vanleg er ein habil skrivar.
Grunnen til at eg tek opp dette temaet ein gong til,
er at eg nettopp ”snubla” over ei overskrift på MSN
sine nettsider der ein kunne lese ”Du kan sloss!”.
Lettare indignert over stavinga klikka eg på lenka
og fann ut at den same (?) journalisten der hadde
skrive ”Du kan slåss”. Journalisten kunne altså
stave ordet korrekt – i alle fall av og til. Kanskje
oppfattar journalisten begge formene som korrekte,
eller så har han eller ho berre blitt ”avstumpa” i
forhold til skriftbiletet. Ein reagerer ikkje lenger
på rettskrivinga, for uttalen er jo lik uansett –
det same som gjeld for forskjellen mellom ”og” og
”å”.
Journalisten er ikkje åleine på nettet. Eit kort søk
på Google gjev 8.620 oppslag for ”kan sloss” og
12.000 oppslag for ”kan slåss”. Ein finn altså begge
stavemåtane nesten like mange gonger på nettet –
ikkje rart at ”folk flest” etter kvart ikkje lenger
veit kva som er riktig. Men – vent litt – akkurat
som med forskjellen mellom ”og” og ”å”, finst det
også her heilt klare og enkle reglar. Dersom ein ser
på verbforma utan s, vil dei fleste ikkje ha
problem. Det er jo rett fram: slå – slo – har
slått. Forskjellen her er at det er samsvar
mellom uttale og skrivemåte. Fortidsforma blir
skriven med o, som også blir uttalt som o.
Spørsmålet er då korfor så mange ikkje klarer å
overføre dette systemet til s-forma av verbet, som
ikkje skil seg på nokon annan måte enn at ein får
-ss i tillegg til bøyinga/vokalendringa. (I
nynorsk kan ein ha litt fleire variantar av bøyinga.
Men det er underordna her.)
Skriv som vi uttalar
Norsk er eit relativt ortofont (lydrett) språk; det
tyder at vi i stor grad skriv orda slik vi uttaler
dei. Men dessverre er det ikkje alltid samsvar
mellom uttale og stavemåte. Det har likevel sine
fordelar at vi normerer skriftspråka våre slik at
det først og fremst er lagt vekt på indre samanheng
mellom ulike ordformer. Og dersom det står i avisa
at ”språklærarane slåss/sloss for betre
skriveopplæring”, kan det jo vere greitt å vite om
ein skal vere med og engasjere seg, eller om kampen
er over allereie.