Frank Juliussen svarte 21.12. på
innlegget mitt, men eg meiner vel framleis at ein
blandar korta når ein prøver å gjere nissar om til
demonar for så i neste omgang å skylde på ein
antikrist som står bak det heile.
Sjølv om Juliussen siterer
flittig frå Bibelen og andre stader, handlar det vel
først og fremst om tru. Ein kan velje å tru på
nissar og demonar, ein kan velje å tru på nissar som
demonar, og ein kan velje å la vere å tru på at
nissar og demonar finst i det heile. Teksten frå
1555 som Juliussen siterer, der det står at nissen
var eit utbreitt fenomen då kristendommen kom til
Danmark, og at mange prestar føretok utdrivingar og
nedmaningar, er for så vidt kulturhistorisk
interessant, men har nok ikkje nokon større verdi
enn om Margit Sandemo eller Märtha Louise fortel at
englar eller andre gode hjelparar er eit utbreitt
fenomen. Tru, håp og kjærleik handlar som regel mest
om kva ein sjølv vel å forhalde seg til. Men dette
er ein type teologisk og filosofisk diskusjon som
fjernar seg frå det som var mitt poeng i
utgangspunktet.
Eg er først og fremst
språkvitar, og det er ordet ”nisse” eg ønskte å
kommentere, ikkje nødvendigvis om nissar eller
demonar finst eller ikkje. Det får den enkelte
bestemme for seg sjølv. Sjølv om det er andre ting
ved Juliussen sitt perspektiv som eg finn
problematisk å ta stilling til, er det den direkte
koplinga mellom ordet eller termen ”nisse” eg ønskte
å diskutere. Ordet ”nisse” kjem av Nils som er ei
kortform av Nikolaus, som i den kristne tradisjonen
blir sett på som ein heilag person. Dette er truleg
grunnen til at ein etter kvart valde å bruke eit
slikt kristent namn på den eller dei som ein trudde
budde på eller vakta garden. Innføringa av
kristendommen førde til at mange gamle fenomen, namn
og tradisjonar blei endra eller tilpassa.
Dette skjedde også med den
tradisjonelle julefeiringa. Der har Juliussen rett.
Historia med ”nissen” som Juliussen bruker, handlar
om ein stein på Gilje på Island der bonden Kodran
trudde ”årmannen” hans budde – der står det
ingenting om nokon ”nisse”. I ei dansk omsetjing
bruker ein ordet ”skytsånd”. Kristni saga handlar
elles om korleis ein prøvde å innføre kristendommen
på Island, og vi veit alle at ein tok i bruk både
det eine og det andre middelet for å få det til.
Ein ville nok ha hatt mykje
større problem med å innføre kristendommen som ein
statsreligion dersom ein ikkje hadde valt å tilpasse
det nye til det gamle. Kristendommen kom til Noreg
og fortrengde dei gamle gudane og også dei såkalla
underjordiske vesena. Burde ikkje Juliussen vere
nøgd med det? Og kva gjer det om ein feirar ein
bursdag ein annan dag enn på sjølve dagen? Dei
fleste av oss har då vel valt å leggje feiringa av
eigen bursdag eller ungane sine bursdagar til ei
passande helg eller andre fridagar på grunn av
praktiske omsyn. Poenget må då vere innhaldet og
ikkje forma.
Dersom ein vil vere bokstavtru
som Juliussen, blir det viktigare med ord og ritual
enn med innhaldet. Ønskjer ein å feire at Jesus blei
fødd, spelar det vel eigentleg ikkje noka rolle når
ein gjer det? Tek ein på seg ei såkalla nisselue,
tyder det ikkje at ein verken representerer, feirar
eller trur på ein antikrist. Dei som utelukkande vel
å feire jul for å ha det hyggeleg saman med familie
og venner, og eventuelt for å nyte eit lite avbrekk
i mørketida, identifiserer seg nok heller ikkje med
det biletet som Juliussen prøver å teikne.
Julefeiringa har fått ei viss form, men det er opp
til den enkelte å fylle forma med innhald – og då er
det ikkje nisselua som er utfordringa. Med dette vil
eg ønskje god jul til alle – uansett tru eller
legning.