Det har ikkje vore noka hemmelegheit akkurat at
Høgre (og FrP) er imot sidemålet i skolen. Med
”sidemålet” meinte og meiner ein helst nynorsk,
sjølv om det finst ein god del nynorskbrukarar også
innanfor desse partia. No søndag 8. mai skulle visst
vere den store frigjeringsdagen frå sidemålet, for
då bestemte Høgre seg for å vedta at det skulle vere
frivillig for elevar i ungdomsskolen å lære seg
nynorsk.
Det er jo visse parti som har det med å gå for
lettvinte løysingar og det som ”folk flest” ser ut
til å ønskje seg på eitt bestemt tidspunkt utan at
ein tenkjer særleg mykje over konsekvensane. Når det
gjeld språksituasjonen i Noreg, har dei raud-grøne
jobba ut ifrå eit langsiktig strategidokument
utarbeidd av Språkrådet i 2005, ”Norsk i hundre”,
eit dokument på heile 192 sider. Som eit resultat av
dette fekk ein Stortingsmelding 35, 2007-2008, ”Mål
og meining. Ein heilskapleg norsk språkpolitikk” på
266 sider, der norsk språkpolitikk er grundig
diskutert.
No er det ikkje slike dokument ”folk flest” har for
vane å lese og setje seg inn i. Som regel er det
lettare å finne ei eller anna sak som verkar grei og
stemme over den for så å sjå korleis det går. Sidan
mykje av politikken i Noreg blir utarbeidd med
hovudbase i Oslo, blir det lett å gløyme at det
finst folk utanfor bygrensa, og at landet er både
langt og variert på alle måtar, ikkje minst språkleg
og kulturelt.
GD er ei avis der det språklege mangfaldet blir teke
på alvor. Det er ei av dei svært få avisene i landet
der redaksjonelt stoff faktisk kjem på begge
målformene, og der det som regel ikkje er noka
tydeleg diskriminering av nynorsk. På den måten er
GD ei avis som aktivt tek stilling til at det finst
ein god del lesarar som faktisk har nynorsk som sitt
hovudmål, og som også knyter sin språklege og
kulturelle identitet til nynorsk. Ei avis som nektar
å godta at nynorsk framleis har ein viktig posisjon
i Noreg, vil ikkje kunne vere ei god avis for alle,
heller ikkje for dei som jobbar i avisa. Aviser som
nektar journalistane sine å bruke nynorsk, driv med
aktiv diskriminering av enkeltpersonar og -grupper,
noko som gjer at desse avisene faktisk blir mindre
truverdige når dei prøver å framstå som om dei
engasjerer seg for dei svake og undertrykte i
samfunnet.
Det er
mykje ein kunne ha skrive om dette. Men det som er
litt merkeleg akkurat no, er at GD ikkje valde å
omtale Høgre sitt vedtak mot nynorsk noko særleg. Ei
anna avis som bruker begge målformene aktivt, er
Romsdals Budstikke. Dei skreiv på leiarplass 9. mai:
”Vi tror det er godt for det norske
samfunn at vedtaket fra Høyre ikke får gjennomslag.
Vi er derfor enig med partileder Erna Solbergs
stemmegivning. Gjennom språket, både bokmål og
nynorsk, tar vi vare på vår arv. Vårt tredelte
språk, bokmål, nynorsk og samisk, er en del av vår
identitet som nasjon. Vi gjør ikke deler av et fag
frivillig fordi et flertall av elever ønsker det.
Det ville åpne for en underlig skolereform. Romsdals
Budstikke har i sine spalter begge målformer, og vet
at det er en viktig del av vår identitet som talerør
for hele distriktet.”
For ei
avis, som har språk og kommunikasjon som sitt
viktigaste verktøy, og som ønskjer å nå ut til flest
mogleg lesarar, kan det faktisk vere eit poeng å
gjere det heilt klart at ein ikkje diskriminerer
enkelte lesarar på bakgrunn av målforma deira. I mai
er det jo mange nok flaggdagar frå før; kanskje GD
også bør tone flagg og markere at ein tek avstand
frå alle politiske vedtak som går ut over det
språklege og kulturelle mangfaldet vårt.