Ein GD-lesar (11.02.) reagerte på skrivemåten av
seter (støl, beiteområde med hus) med e. ”Seter” var
noko ein sat på, skreiv lesaren – underforstått:
dette hadde ingenting med ”sæter” å gjere.
Normert skrivemåte i bokmål og nynorsk er faktisk
”seter” med e. Nynorsk har per i dag også [sæter]
som såkalla klammeform. Dansk har berre ”sæter”, og
mange stader i Noreg hadde i lang tid danske namn og
skrivemåtar. Dette tyder likevel ikkje nødvendigvis
at ”sæter” er dansk, jf. den nynorske klammeforma. I
gammalnorsk hadde ein faktisk både ”setr” og ”sætr”,
og dette er altså også reflektert i uttalen og
skrivemåten av setrene i ulike landsdelar i Noreg.
I motsetning til kva GD-lesaren trur, så har
seter/sæter faktisk direkte samanheng med sitje. Ein
vanleg måte å lage substantiv av verb på i
gammalnorsk var å ta utgangspunkt i fleirtalsforma
av verbet i fortid. For sitja sin del var bøyinga
sitja – sat (eintal) – sátu (fleirtal).
Han sat – dei såte var òg lenge relativt
vanleg i norske dialektar, t.d. i Setesdal. For å
lage eit substantiv tok ein altså denne
fleirtalsforma av verbet. Men så kunne det gjerne
oppstå fleire substantiv med liknande tyding, t.d. ”sát”,
stad der ein sit på lur eller i bakhald. Fleirtal av
sát var sátir eller sætr. Ei ”sæta” var ei kvinne
som sat åleine på garden når mannen var utanlands
(grasenkje). Eit ”sæti” var noko ein sat på (sete),
eller også høy som var lagt i såte, dvs. som
bokstaveleg talt sat der det blei lagt. Og ”sætr”
blei brukt om sete eller bustad, dvs. der ein har
busett seg, men også om seter eller støl. Ordet
”setr” var i gammalnorsk òg brukt om sete eller
bustad (jf. alle stadnamna med –set), men også om
t.d. solnedgang, sola sette seg (jf. engelsk sunset).
Elles hadde ein også ordet ”seta” for sitjing, sete
eller tilhald på ein stad, men også for t.d. eit
mannskap eller ei hærsamling som låg roleg på ein
stad.
For å gjere ei lang historie kort, så har altså
seter/sæter faktisk også å gjere med sitje. Når det
gjeld uttale og skrivemåte, kan ein gjerne diskutere
dette og vere einig eller ueinig alt etter kvar ein
kjem ifrå, eller kva slags haldningar ein har til
tale og skrift. I dette tilfellet er det ikkje
nødvendigvis nokon fasit. Skriftnormalane våre seier
éin ting, mens konkrete namn på ulike setrer ikkje
nødvendigvis treng å rette seg etter det, med mindre
dei kjem inn under stadnamnlova.