På denne sida vil eg prøve å
gje nokre tips i samband med oppgåveskriving / eksamen i grammatiske
emne. For det
første er det viktig å ha som utgangspunkt at oppgåver og eksamenar
ikkje blir laga for å "ta" nokon. Det er ikkje slik at det er nokon
slemme og ondsinna førelesarar som ser det som si livsoppgåve å
plage studentar, og få dei til å kjenne seg dumme og ta talentlause
ved å komponere mest mogleg uforståelege og uoverkommelege oppgåver.
No skal eg ikkje uttale meg på vegner av alle lærarar i verda, men
motivasjonen til ein lærar er normalt at han/ho faktisk har eit
genuint behov for å formidle og å bli forstått (det ligg vel ein
viss grad av sjølvstadfesting i dette...). Ein har gjerne eit
grunnleggjande ønske om å hjelpe andre menneske med å utvikle seg
vidare og oppnå eit høgare bevisstheitsnivå. Og i eit
samfunnsperspektiv handlar det sjølvsagt også om å skape "gagns
menneske". Dette kan ein tolke (eller mistolke) som ein vil, men det
er jo eit poeng at ein fungerer i eit samfunn. Om ikkje anna vil
dette med utgangspunkt i ei "snill" tolking tyde at ein er sikker på
seg sjølv og har kunnskapar nok til å klare seg i jobb og
kvardagsliv. Det
er fleire mål knytte til oppgåver og eksamenar. Når det gjeld
heimeoppgåver/semesteroppgåver, er det først og fremst pedagogiske
mål. Det er ikkje slik at ein vil påleggje studentane enda meir
arbeid i ein elles allereie pressa studiesituasjon. Poenget er å gje
studentane ei moglegheit til å arbeide konstruktivt og strukturert
med pensumet ut ifrå det som læraren vurderer som relevant. Det er
altså meint å hjelpe studentane med å finne det rette perspektivet
på pensumstoffet. Spesielt i byrjinga av eit studium manglar ein
gjerne eit større oversyn over faget og stoffet, som gjer at ein
ikkje veit kvar ein skal starte, kva som er viktig/sentralt, og kva
som er mindre viktig/sentralt; ein "druknar" rett og slett i eit hav
av informasjon som ikkje har blitt stykka opp i fordøyelege bitar
enno. Så, både førelesingar og heimeoppgåver/semesteroppgåver er
tenkt som konkret fagleg-pedagogisk hjelp. Førelesingane er ofte
ikkje obligatoriske, mens heimeoppgåver/semesteroppgåver gjerne er
det. Ein kan sikkert diskutere dette, men nokre studentar må berre "tvingast"
til sitt eige beste, og då er det like greitt at den same regelen
gjeld for alle. :-) La oss seie det sånn: ein blir ikkje akkurat
dummare av å skrive oppgåver, uansett om ein likar temaet eller
ikkje, eller om ein kan stoffet godt frå før eller ikkje. Og
spesielt for norsk-/nordiskfaget gjeld det at ein aldri kan få
skrive nok! Eg vil påstå at dei fleste skriv altfor lite i løpet av
studiet sitt. Så, sett i gang og skriv! Bruk dei arenaene som de er
på; tekstmeldingar, e-post, brev, notatbøker, merkelappar, dikt,
forteljingar, noveller, romanar, avisinnlegg, klagebrev; berre
skriv... Og det skadar absolutt ikkje om de prøver dykk på å skrive
nynorsk i ulike samanhengar. Har ein valt å studere eit fag, har ein
også valt dei delemna som følgjer med faget; og det er ikkje alltid
slik at ein likar alle delane av faget like godt. Men det kan vere
eit poeng i å utfordre seg sjølv på nettopp desse delane, og prøve å
lære å meistre dei like godt som dei delane ein kan eller likar frå
før. Korfor skulle ein velje å bruke tid på å studere noko ein kan
frå før? :-) (Kvar blei det av Goethes Faust?)
Så er det eksamensoppgåver. Som
sagt, dei blir heller ikkje laga for å plage nokon. Vi kan vere for
eller imot det utdannings- og vurderingssystemet vi har, og vi kan
gjerne engasjere oss politisk for å endre systemet eller delar av
systemet. Men det er no ein gong slik at vurderingssystemet er bygd
opp rundt ulike former for prøver og vurderingar; og desse er igjen
gjerne lagt opp til å kunne måle kunnskapar og ferdigheiter - i den
grad det er mogleg. Som førelesar/lærar vil ein prøve å førebu
studentane på desse prøvene så godt ein kan (noko som sjølvsagt også
krev at studentane gjer ein innsats). Vurderinga vil så skje etter
visse kriterium. Når det gjeld det norske karaktersystemet i høgare
utdanning, så er det no tilpassa den europeiske standarden for
bokstavkarakterar (A-F). Med bokstavkarakterane følgjer det ei
kvalitativ beskriving av krava for å kunne oppnå dei ulike
karakterane. Kva
har så alt dette å seie for eksamen i grammatiske emne? Igjen er det
viktig å peike på at eksamensoppgåver ikkje blir laga for å få
studentane til å stryke. Poenget er å lage oppgåver som gjer det
mogleg for studentane å vise kva dei har klart å tileigne seg av
kunnskapar og ferdigheiter i forhold til eit definert pensum. Når
det gjeld formell grammatikk, er det ikkje alltid så lett å vurdere
kor mykje kandidatane eigentleg kan, dersom dei skriv korte svar,
eller eventuelt nøyer seg med å teikne ein treanalyse av eit ord
eller ei setning. I den generelle beskrivinga av karaktertrinna er
det lagt vekt på vurderingsevne og sjølvstende. For å ta eit døme
frå matematikken: 1 + 1 = 2. Dette er utan tvil eit korrekt svar.
Men korleis skal ein som sensor kunne ta stilling til kva slags
vurderingsevne eller sjølvstende som ligg til grunn for dette
svaret? Her er det faktisk opp til studenten å vise korleis ein har
gått fram for å komme fram til svaret. Tek vi eit konkret døme frå
grammatikken, kan ein godt analysere funksjonen til dei ulike ledda
i setninga Eg har slått på radioen som SUBJEKT - FINITT
VERBAL - INFINITT VERBAL - ADVERBIAL med tilsvarande formanalyse:
pronomenfrase - fin. verb - inf. verb - preposisjonsfrase (prep. +
substantivfrase). Dette er på ein måte ein "rett-fram-analyse", og
ein ville godt kunne seie at analysen er nokolunde korrekt. MEN
dersom ein no hadde byrja å analysere og i tillegg skrive ned
refleksjonane rundt moglege alternativ, hadde ein gjeve sensoren ein
sjanse til å sjå graden av vurderingsevne og sjølvstende. Studenten
kunne ha vist at han/ho kanskje heller hadde resonnert seg fram til
å analysere på som ein verbpartikkel ist. ein preposisjon med
utfylling. Det hadde vore greitt å fått fram at det er ein skilnad
mellom uttrykk som å slå på radioen og slå på bordet.
Ein alternativ analyse ville då ha vore: SUBJEKT - FINITT VERBAL -
INFINITT VERBAL + partikkel - OBJEKT, med tilsvarande formanalyse:
pronomenfrase - fin. verb - inf. verb - verbpartikkel -
substantivfrase. Og denne analysen hadde nok vore "betre" i denne
samanhengen. Men poenget her er ikkje sjølve konklusjonen; 1 + 1 = 2
er jo også heilt korrekt. Poenget er vegen fram til konklusjonen;
resonneringa, vurderingane, sjølvstendig tenking.
Så, det er opp til studentane å
velje om dei vil ha "rette" analysar, som då gjerne i utgangspunktet
svarer til ein C dersom dei står heilt for seg sjølve; eller om dei
vil vise fram sine inste tankar og vurderingar, og på den måten gje
sensoren ein sjanse til å oppdage kor sjølvstendige dei er, og
korleis dei vurderer sine eigne analysar i forhold til teori og
pensum. Eksamen
er ikkje laga for å få dykk til å stryke. Eksamen er laga for å gje
dykk ein sjanse til å vise kva de har lært. Så vis det og skriv! :-)
Lykke til!
Jens
Karakterskalaen
|